Nakiisa sa pamamahagi ng tulong ang grupo ng mga kabataang mountaineering o ang Bagtasin Pilipinas Mountaineers (BPM) sa Cuenca Central Elementary School Batangas sa mga naapektuhan ng pagputok ng Bulkang Taal, Enero 12, 2020.

Isa sa mga adhikain ng BPM ay maipaabot ang mga donasyong kanilang nalilikom mula sa mga nagtitiwala at nakikisimpatiya sa kanilang paglilingkod sa mga kababayan nating naapektuhan ng ganitong uri ng kalamidad.

Sa katunayan, limang taon nang tumutulong ang Bagtasin Pilipinas Mountaineers sa iba’t ibang lugar o komunidad na kanilang pinupuntahan.

Ang Bagtasin Pilipinas Mountaineers ay nagsasagawa ng mga outreach program, tree planting at ang pagtulong sa mga kabataang mag-aaral na hindi napupuntahan ng ilan sa atin dahil ang mga paaralang ito ay nasa kaloob-looban pa ng mga kabundukang kanilang inaakyatan.

“Hindi lang sa pag-akyat ng bundok nagsisimula at natatapos ang aming kasiyahan at hindi sa mga tanawin nito kundi sa mga tao’ng alam namin na nangangailangan din ng tulong at dapat bigyang pansin sa oras ng mga kalamidad. We work as One kumbaga.” pahayag ni Mark Allen Santos, isa sa mga Organizer at aktibong miyembro ng Bagtasin Pilipinas Mountaineers.

Aniya, ipagpapatuloy ng grupo ang kanilang sinimulang adhikain at mga aktibidad na nagbibigay kasiyahan sa bawat isa at sa mga naaabutan ng kanilang tulong.

*Photo by: BAGTASIN PILIPINAS MOUNTAINEERS