Face masks with valves hindi safe gamitin, ayon sa FDA
Pinaalalahanan ng Food and Drug Administration (FDA) ang publiko na huwag gumamit ng face masks na mayroong valves o bilog na nasagilid ng face masks bilang pamproteksyon laban sa coronavirus disease (COVID-19).
Sa isang interbyu kay FDA Director-General Eric Domingo ng radio station DZBB, aniya na ang ginagamit ng karamihan sa atin na face masks with valves ay hindi rehistrado para sa medical purposes.
“Hindi sila mga medical and/or surgical masks, kundi ay mga industrial masks. ‘Yan po ang ginagamit ng mga karpintero o ng mga naga-grinding,” he said. “So ang talagang intensyon niyan ay hindi makapasok ‘yung alikabok sa ihihinga ng tao.” Salaysay ni Domingo.
Dagdag pa niya, “Halimbawa kung ikaw ay may sakit at suot-suot mo [yung may valve], maaring lumabas po ‘yung hininga niyo doon sa valve. Kung infection control ang pag-usapan, yung mga [masks with valves] ay hindi po para doon,” he said.
“Ang proteksyon niya one-way, eh ang gusto natin ang proteksyon ng mask ay two-way. Kung tayo ay walang sakit hindi tayo mahahawa, kung tayo ay may sakit hindi tayo manghahawa,” muling tugon ni Domingo.
Sinabi pa ni Domingo na mas makabubuti kung ang ating gagamitin ay medical or surgical masks. Maari ring gumamit ng cloth masks.
“Sa mga ospital o sa mga naga-alaga ng may sakit, gusto po talaga natin medical or surgical use na mga masks. Pero kung everyday use, kahit naman po mga cloth masks. Mas safe pa po ang mga regular masks na walang valve,”
Pinakiusapan din ng FDA Chief ang mga ahensya at pamunuan ng mga ospital na ipagbawal ang pagtanggap ng mga indibidwal na gagamit ng masks with valves. (DM | PHOTO COURTESY: THE MEDICAL CITY)
