P15 billion napunta diumano sa 711 Hospitals sa bansa ayon sa PhilHealth
MANILA, Philippines — “Hindi nawawala ang P15B. Napunta ito sa 711 ospital sa bansa bilang ayuda sa pandemya at para mapanatili silang bukas para sa mga pasyenteng nangangailangan ng gamutan.” Ito ang ipinoste ng Philippine Health Insurance Corporation (PhilHealth) sa kanilang official social media account nitong Lunes, Marso 8, matapos na maglabas ng infographic na nakasaad doon kung saan nga ba napunta ang P15 billion kontribusyon ng ating mga manggagawang Pinoy sa bansa.
Sa inilabas na statement ng ahensya, P14.21 billion or 95% ng fund nito ay napunta diumano sa 711 hospitals sa bansa, para ipaayuda sa treatment ng mga COVID-19 patients.
Isinama rin nila dito ang link sa kanilang latest updates ng Interim Reimbursement Mechanism (IRM) liquidation update, ang huling pag-update nito ay noong Pebrero 26 lamang.
Dahil sa paglabas ng ahensya ng inforgraphics, hindi maiwasan ng mga netizen na kanilang pagtawanan kung paanong interpretasyon na ginawa ng ahensya ukol sa nasabing liquidation tracker nito.
Ipinunto ng mga netizen kung paanong “magical” infographics ang ipinakita ng ahensya.
Sinabi pa ng ilang Pinoy sa bansa na maghihintay na lamang daw sila sa kung ano ang magiging resulta sa balitang ito mula sa Commission on Audit kaysa paniwalaan daw ang PhilHealth. (DM)
