BERSO: “Hindi Ko Malimutan” ni Makatang Torpedo

HINDI KO MALIMUTAN
ni Makatang Torpedo [MakTulaan]

Hindi ko malimutan noong unang pagkikita
Titigang wala man lang halong salita
Kapwa nahulog sa bilis na tatlong minuto
Pag-ibig na hindi pinag-aralan subalit natuto.

Hindi ko malimutan ang simula ng ligawan
Noong una'y hirap sa Oo dahil puro ewan
Hindi nagtagal pagkalipas ng tatlong buwan
Ikaw at ako'y nagkaroon ng kaarawan.

Hindi ko malimutan ang unang yakap at halik
Sa aking gunita sa iyo'y ito ay bumabalik
Ang iyong mga yakap na kay higpit
Dulot upang maibsan yaring aking galit.

Hindi ko malimutan noong kamay ko'y iyong hawak
Ikaw ay may gandang kalapati samantalang ako'y uwak
Hindi mo kinahiya ang tulad ko sa maraming tao
Dito mo pinatunayang mahal mo kong totoo.

Hindi ko malimutan noong ako'y nangako
Hindi ako papayag na hindi sa dulo ang ikaw at ako.
Ako'y sigurado sa tulad mong dilag
Sa ating mga kapintasan tayo'y maging bulag.

Hindi ko malimutan noong una mong pagluha
Akala ko noon ay bumabagyo at babaha
Subalit mas hindi ko malimutan ang muli mong pag-iyak
Luhang hindi dahil sa lungkot kundi sa galak.

Lumuhod ako sa iyong kinatatayuan
Hawak ang singsing na sayo'y iaalay
Tinanggap mong maluwag ang aking pakay
Sinuot sa iyo ang singsing at ako'y iyong hinagkan.

Hindi ko malimutan ang lahat
Mula simula hanggang sa aking pagtatapat
Hindi ko ito malilimutan
Ngayong palapit ka na sa altar ng simbahan.
#makatulaan 
(Photo; NYCPost.com)