Hepe ng district hospital sa Buluan, Maguindanao nagpabakuna sa harap ng publiko
[RASHID RH. BAJO with reports from Abdul Campua]
BULUAN, Maguindanao [BARMM] ––Boluntaryong nagpabakuna sa publiko ang hepe ng Buluan District Hospital na si Dr. Rizaldy L. Piang upang ipakita ang suporta nito sa “vaccination program” ng gobyerno at ipaalam sa mga tao na walang dapat ikatakot sa bakuna.
Makikita sa larawan na nakangiti pa si Dr. Piang habang inihahanda ang bakuna para sa kanya.
Naganap ang pagpapabakuna ni Dr. Piang matapos ang turn–over ceremony ng “Sinovac Vaccines” para sa mga health worker ng Buluan District Hospital.
Ang nasabing pagbakuna kay Dr. Piang ay personal na pinangasiwan ni IPHO–Maguindanao Provincial Health Officer Dr. Elizabeth A. Samama.
Ayon kay Dr. Samama, si Dr. Piang ang unang nabakunahan at pagkatapos ng ilang mga minuto, nagpabakuna na rin ang mga frontliner at mga health worker ng Buluan District Hospital.
Ayon sa report, masaya si Dr. Piang sa pagpabakuna nito dahil alam nitong makakabuti ito para sa kanyang sarili.
Sa kasalukuyan, hinihikayat ng gobyerno ang lahat na magpabakuna at iginigiit nito na walang dapat ikatakot mga tao sa bakuna dahil ito ay makakatulong sa kanila para makaiwas sila sa nakakamatay na COVID-19.
Ayon sa report, hinihintay pa ng gobyerno ang binili nitong mga bakuna sa labas ng bansa para masimulan nito ang pagbakuna sa mga taong prayoridad ng gobyerno na bakunahan. (Photo: IPHO–Maguindanao)
