Libreng panganganak at buntis kits ibinahagi sa Rosario, Cavite
Read Time:1 Minute, 23 Second
[Ni Sid Luna Samaniego]
Buntis Congress 2021 sa Rosario, 387 na buntis ang makikinabang
ROSARIO, Cavite — Sa layuning mas matugunan at mapabuti ang kalagayan ng mga nagbubuntis, hanggang sa kanilang panganganak, at nang mabawasan ang child mortality rate, umarangkada na ang Buntis Congress sa bayan na ito.
Tinatayang may kabuuang 387 na mga buntis ang dadalo sa programa na ito na hinati sa 7 bahagi na may temang “We Make Change Work for Women”, at bilang bahagi na rin ng pagdiriwang ng International Womens Month.
Sa programa na ito ay ipinaalala ng Rosario Health Unit sa pangunguna ni Dr. Noriel Emelo ang kahalagahan ng tamang pag-aalaga sa kanilang mga sanggol kahit ito ay nasa kanilang sinapupunan pa lamang hanggang sa ito ay kanilang ipinanganak.
Dagdag pa ni Emelo, kailangang magkaroon ng sapat na kaalaman ang mga buntis ukol sa pangangalaga ng sinapupunan upang maiwasan ang mga kumplikasyon habang nagdadalang-tao.
Masusi ring tinalakay ang Breastfeeding, Prenatal Care, at Family Planning. Bukod sa kaalaman at makabuluhang impormasyon ay pinagkalooban naman sila nina Mayor Jose Voltaire V. Ricafrente at Kon. Bamm Gonzales ng Buntis Kits na kanilang magagamit sa pagbubuntis hanggang sa pagsilang ng kanilang mga baby.
Samantala, ibinahagi naman ni Gng. Irene Gallardo, 37 taong gulang, isang padyak driver, tubong Nasugbu Batangas na kasalukuyang naninirahan ngayon sa Brgy. Bagbag 2 sa bayan na ito ang kanyang pasasalamat sa lokal na pamahalaan sa programa na ito na nagbigay sa kanya ng maraming kaalaman at impormasyon. Dagdag pa nito ang libreng buntis kits na kanyang magagamit sa panganganak.
Kilala ang bayan ng Rosario sa pagbibigay ng libreng serbisyo sa panganganak. #DM
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
